Arkivkveld i Hedalen – ein vellukka kveld med lokalhistorie i fokus

Tysdag 29. april 2025 arrangerte Bautahaugen samlinger og Valdresmusea igjen arkivkveld i Hedalen. På Bautahaugen møttest ein liten, men engasjert gjeng med ivrige museumsvenner som bidrog til ein hyggeleg og lærerik kveld.

Gode samtalar og lokalhistorisk engasjement

Det vart servert kaffi og kake, og stemninga var god. Det oppstod mange gode samtalar om arkiv og bevaring, og både deltakarar og arrangørar delte erfaringar og tankar om verdien av å ta vare på lokalhistorisk materiale.

Lydopptak frå arkivet rørte publikum

Eit spesielt fokus denne kvelden var lydopptak. Valdres Folkemusikkarkiv er Noregs eldste regionale folkemusikkarkiv, og arbeider med innsamling, digitalisering og bevaring av privatopptak som ikkje er kommersielt utgitt.

Frank Rolland frå Valdres Folkemusikkarkiv spelte av fleire lydopptak frå arkivet, og publikum fekk høyre både song og spel frå lokale hedølingar. Nokre av opptaka var svært gamle – mellom anna innspelingar av personar fødde seint på 1800-talet – noko som gjorde sterkt inntrykk.

Arkivmateriale frå bygda levert inn

Formålet med kvelden var både å informere om Innlandsarkiva i Valdres, og å ta imot arkivmateriale for bevaring. Det vart levert inn ulike typar arkivmateriale, mellom anna ein protokoll frå Sør-Aurdal Arbeiderparti, arkivmateriale frå utstillingsproduksjonar i regi av Bautahaugens venner, ei medlemsbok frå Ungdomslaget Solsprett, ei rekneskapsbok for 17. mai-arrangement på Bautahaugen, og diverse arkivmateriale om Hedalsengene.

Informasjon om Innlandsarkiva og arkivtenester

Eirin Breie ved Valdresmusea informerte også om moglegheita for både avlevering og innsyn i papirarkiv og digital arkiv, foto, papirarkiv og lydopptak.

Innlandsarkiva – eit nettverk for framtida

Arrangementet var ein del av musea sitt arbeid i Innlandsarkiva, eit nettverk av museumsarkiv i Innlandet. I Valdres er det avdelingar på Bautahaugen Samlinger, Bagn Bygdesamling og Valdres Folkemuseum. Her blir papirarkiv, fotoarkiv og lydarkiv frå privatpersonar, foreiningar og lag teke vare på for ettertida.

Meir informasjon om arkivfunksjonen ved musea i Valdres finn du på valdresmusea.no.