Jamlege orienteringarLEIAREN 

Sør-Aurdal kommune har gjennomført ei stor opprusting av Hedalen barne- og ungdomsskole og Hedalen naturbarnehage. Resultatet har vorte svært bra, og det er det mange som er glade for.

I ei ekstra orientering i kommunestyremøtet 14. november kom det fram at opprustinga av skolen og barnehagen då såg ut til koste 43,5 millionar kr inklusiv moms.

I slutten av april 2024 vart kommunestyret i sak 19/24 gjort kjent med at opprinneleg vedteken budsjettramme ikkje ville halde. Det folkevalde organet vedtok å auke ramma med 7,65 millionar kroner, men det viste seg å heller ikkje vere nok. I orienteringa 14. november vart det varsla ein ny sprekk på 6,75 millionar kroner.

Overskridingane utgjer ein auke på 49,5 %. Dette er samanlikna med budsjettet kommunestyret vedtok for rehabiliteringsprosjektet i sak 12/23.

Dei siste opplysningane kom svært overraskande på kommunestyret, og kommunedirektøren måtte svare på mange kritiske spørsmål.

Kommunen slit med å få driftsbudsjetta i balanse, og fleire store investeringsprosjekt ventar. Kommuneøkonomien har ikkje godt av verken denne eller fleire slike overskridingar.

I reglementsheftet for Sør-Aurdal kommune les vi følgjande under overskrifta rutinar for kontroll og tilbakemelding:

«Kommunedirektøren tilbakemelder om oppdatert økonomisk status i budsjettåret til kommunestyret hvert tertial. Formannskapet gis løpende orientering om økonomisk status.»

Formannskapet skulle altså ha fått jamlege orienteringar, sidan dette skal skje kontinuerleg. Det har dei ikkje fått i denne saka, og dermed har dei ikkje hatt høve til å gripe inn.

I møtet 12. desember vedtok kommunestyret å rullere noverande delegeringsreglement og økonomireglement.

Både kommunestyret og formannskapet finn heimel i dette reglementet for å krevje meir informasjon – og det til rett tid.