Kor mykje gjeld toler kommunen å ha?LEIAREN 

Ved årsskiftet 2023/2024 hadde Sør-Aurdal kommune 240,6 millionar kr i langsiktig gjeld. Lånegjelda per innbyggar var på 84 858 kr.

Kommunens totale driftsinntekter var på 399,819 millioner kr i 2023. Kommunestyret har vedteke at netto lånegjeld i prosent av driftsinntektene ikkje skal vere høgare enn 75 %.

Det er to måtar å rekne ut dette måltallet på. Den første tek kun omsyn til kommunen si eiga gjeld. Den andre inkluderer kommunen sin del av gjelda til interkommunale selskap. Tala vi finn i årsrekneskapen for 2023, er godt under måltalet på 75 %: 58 % og 67 %.

Vi meiner likevel det er grunn til bekymring. Store investeringar ventar i åra som kjem. Kva ny ungdomsskole i Bagn vil koste, veit vi ikkje enno. Derimot veit vi at det skal byggjast beredskapssenter i Bagn og brannstasjon i Hedalen. Det ser ut til å bli eit kommunalt ansvar. Barnehage nord i kommunen er ei anna stor utfordring.

Det vi kan slå fast, er at disposisjonsfondet til kommunen ved nyttår var på 47 millionar kr. 5 millionar av fondet er sett av til opprustingsarbeidet på Hedalen barne- og ungdomsskole. Her må ein rekne med om lag 25 millionar kr i lån.

Lånegjelda til kommunen vil auke. Gjelda skal betalast ned med både renter og avdrag. Sjølv om gjelda i 2022 og 2023 var ganske lik, auka rentene frå det eine året til det andre med fem millionar kr.

Viss rentenivået held seg høgare enn før i fleire år, og gjelda aukar, vil ein måtte setje av meir pengar til det. Dette kan få betydelege konsekvensar for tenestene kommunen skal yte.

Vi meiner derfor det er fornuftig å ta ein grundig gjennomgang av alle investeringsplanar. Administrasjonen og dei folkevalde må vite kva for konsekvensar auka gjeld kan få.