Vil busetje 10 flyktningar i 2026

13. oktober 2025 vedtok kommunestyret samrøystes at Sør-Aurdal skal busetje 10 flyktningar i 2026.

IMDi ber kommunen bidra

Bakgrunnen for vedtaket er ein førespurnad frå Integrerings- og mangfaldsdirektoratet (IMDi), som har sett eit nasjonalt mål om å busetje 13 000 flyktningar i 2026.

Sør-Aurdal er bedne om å ta imot 10 av desse, og må òg vere førebudd på einslege mindreårige med følgjeperson.

Ros til kommunen

I brev til Sør-Aurdal kommune skriv Integrerings- og mangfaldsdirektoratet følgjande:

«IMDi vil takke Sør-Aurdal kommune for ein storarta innsats med å busetje flyktningar. Kommunane har vist ein særs positiv vilje til busetjing sidan krigen i Ukraina braut ut, og dette er viktig å vidareføre i 2026.

Kommunane spelar ei sentral rolle i Noreg si handtering av dei historisk høge flyktningstraumane dei siste åra.

Tilgjengelege busetjingsplassar som vert vedtekne lokalt, er avgjerande for landet si samla evne til å ta imot flyktningar. Vi oppmodar difor kommunane om å gjere vedtak i tråd med den nasjonale oppmodinga.»

Kommunen positiv – men peikar på kapasitetsbehov

I saksframstillinga les vi at kommunen kan busetje 10 personar, føreset at det er nok kapasitet innan barnehage, skule, helse og tilgang til eigna bustader i Bagn.

Nærleik til kollektivtransport og plass i introduksjonsprogrammet i Nord-Aurdal vert òg trekt fram som viktig.

• Her kan du lese heile saka.