Kan det bu flyktningar i Hedalen?LEIAR 

Vi bruker mykje tid på å lese kommunale saksdokument. Her er det ein god del interessant sakprosa. Rapporten for 2. tertial 2024 vekkjer ettertanke.

I delrapporten for oppvekst og kultur ser vi at innvandrartenesta til no har busett 20 flyktningar i år.

I saksframstillinga for kommunestyret sitt desembermøte 2023 les vi at det ligg som ein føresetnad at kommunen har tilgang på høvelege bustadar i nærleiken av Bagn sentrum. Busetjing av flyktningar bør skje sentrumsnært.

Tertialrapporten fortel at det ikkje er ledige plassar i Reinli barnehage, og det skaper utfordringar med barnehageplassar for busette flyktningar.

I den same rapporten les vi at det er født 19 barn til no i 2024 i Sør-Aurdal, og det er venta fleire fødslar før året er omme. I 2023 vart det født 23 barn i kommunen.

Barn som er under tre år, tel to plassar i barnehagen per barn.

Det er grunn til å tru at det i åra som kjem, framleis vil vere vanskeleg å seie ja til alle søknader om plass i Reinli barnehage. Barnehage er inne i økonomiplanen, men det vil truleg ta tid før renovert eller ny barnehage er på plass.

Spørsmålet vi stiller, er om det er mogleg å busetje nokre av flyktningane som kjem til Sør-Aurdal, i Hedalen. Det trur vi, og vi nemner desse argumenta:

• Kommunen har to hus som vart bygde som flyktningenbustader i Brunbakklia.
• Det er plass til fleire barn i nyrenovert barnehage og skule i bygda.
• I Temaplan helhetlig boligplan 2022–2030 er sentrum i Hedalen nemt som eitt av to sentrum i Sør-Aurdal.
• Det går buss mellom Hedalen og Bagn fire dagar kvar veke i skuleåret.
• Det er mange fritidstilbod som både barn og vaksne kan vere med på i Hedalen.
• Hedalen har fleire arbeidsplassar som kan gje verdfull arbeidspraksis for flyktningar.

Dette er ei sak som kommunestyret bør få på bordet. Prinsipielle spørsmål høyrer med dette folkevaldet sine oppgåver.