Vassfaret med i KULA

18 landskap i tidlegare Oppland fylke er valde ut av Riksantikvaren, og vil inngå i kunnskapsgrunnlaget for KULA (Kulturhistoriske landskap av nasjonal interesse) i Oppland. Eitt av desse områda er Vassfaret i Sør-Aurdal.

• Her kan du lese heile rapporten frå Oppland.
• Les den delen av rapporten som handlar om Vassfaret.

– Bidra til ei meir føreseieleg arealplanlegging

Frå rapporten: «For å bidra til å ta vare på, og opplyse om, nasjonalt viktige landskap utarbeider derfor Riksantikvaren ei landsomfattande oversikt: Kulturhistoriske landskap av nasjonal interesse (KULA).

Dette er eit oppdrag frå Klima- og miljødepartementet og blir gjennomført i nært samarbeid med regional kulturmiljøforvaltning og med involvering av kommunane. KULA er eit kunnskapsgrunnlag for planlegging , og betyr ikkje eit formelt vern eller freding.

Med oversikta over KULA-landskap signaliserer kulturmiljøforvaltninga tydeleg kva for landskap som har nasjonal interesse, og ønskjer med dette å bidra til ei meir føreseieleg arealplanlegging.

Viktige punkt for planlegging og forvaltning av dette landskapet:

• Systematisk registrering av kulturmiljø bør gjennomførast, følgd av tilstands- og verdivurderingar, og dessutan aktuelle istandsetjings- og vedlikehaldstiltak.
• Areala på plassane og setrane bør skjøttast slik at dei blir haldne opne.
• Den tidlegaste historia til området bør kartleggjast betre for å utdjupe biletet av bruken av utmarksressursane.
• Byggje- og vedlikehaldsplanar bør ta høgde for endra klima, slik at kulturminna blir sikra best mogleg.»