Kongevegvandring

Sundag kunne leiar i Sør-Aurdal historielag,  Åse Østgård Hagen, ynskje velkomen til dei 35 turdeltakarane som møtte opp ved Olavskjelda på Leirskogen.

Blant dei var både prosten i Valdres, Carl Philip Weisser og biskopen i Hamar bispedømme, Ole Kristian Bonden.

Mange av dei frammøtte kom direkte frå Begnadalen kyrkje der Ellen Oddveig Rudi vart ordinert til sokneprest i Reinli og Leirskogen sokn.

Prost Weisser og Anne Karin Eid tala ved kjelda før vi starta. Det vart ei våt vandring langs Kongevegen fram mot Leirskogen kyrkje, men vandrarane var godt rusta mot det våte været og  tok det med godt humør.

Ein dugnadsgjeng på Leirskogen med Liv Skaaren-Fystro som leiar, hadde gjort ein stor jobb men rydding, merking og tilrettelegging. Undervegs var det song og historier om bygda vi vandra gjennom.

Leirskogen sokneråd serverte god og varm suppe og kaffe og kaker i kyrkjestova då vi kom fram. Deretter gjekk vi inn i den trivelege Leirskogen kyrkje til konsert med det treffande namnet «Som en kilde klar og ren».

Prost Weisser var programleiar for kjeldekonserten og ga oss gode ord mellom musikkinnslaga med livets kjelde og livets vatn  som tema.

Vakker middelaldermusikk vart framført av Anders Løberg, Ole Kristian Nyhagen, Helena og Kristina Wright.

Bente Bråten Dokken, leiar i Leirskogen sokneråd, takka dei som hadde bidrege til kongevegvandringa og kjeldekonserten. Og kva var meir naturleg enn å dele ut ei lita flaske med vatn henta frå Olavskjelda.