Hedalen barne- og ungdomsskole og idrettsanlegg. Foto: Arne Heimestøl

Stor rehabilitering av Hedalen barne- og ungdomsskole

Publisert av Arne Heimestøl 18.03.2023. Sist oppdatert 17.03.2023.

Tiltaket har vore inne i økonomiplanen for Sør-Aurdal kommune i fleire år. No foreslår kommunedirektøren at prosjektet skal gjennomførast i 2023 og 2024.

To alternativ

Det er lagt fram to alternativ. Det mest omfattande prosjektet, alternativ 1, er kostnadsrekna til 19,8 millionar kroner når momskompensasjonen er teken med. Alternativ 2, som kommunedirektøren foreslår, er kostnadsrekna til 15,5 millionar kroner etter at momskompensjonen er inkludert.

Utbetring av skoleplassen er med i begge alternativa. Her skal det mellom leggjast ny asfalt.

Totalt areal for skolen er på 2 797 kvadratmeter, og bygningsalderen er frå 26 til 56 år.

Tiltaka som er foreslått

Tilpasse til krav om universell utforming, så langt praktisk mogleg, både ute og inne: heis, rampar, trinnfri framkomst gjennom alle dører, HCWC, akustikk og lys.
Oppfylle krav til brannsikring, rømningsvegar, brannskilje og varsling.
Oppdatere og fornye det elektriske systemet, fordelingsskap, lys, kontaktar og nettverk.
Generell oppussing i delar av eksisterande bygg; dører, veggar, golv og himlingar.
Oppdatere eksisterande ventilasjonsanlegg med nye tilluftskanalar og byggje eit nytt, lite ventilasjonsanlegg i mellombygget.
Bygningsmessige endringar og eit lite påbygg for å betre fylle krav og behov.
Utgreie energisparetiltak, vurdere bergvarme/borehol som supplement til elektrisk straum.

Kostnader

Nr.	Innhald i posten	Alt. 1	Alt. 2
1	Rehab. mellombygg med rektorkontor, toalett og inngang	2,3 mill.	2,3 mill.
2	Varm gang over til gymsal, alt. 2, berre halve vegen	2,0 mill.	0,9 mill.
3	Nytt tilbygg med heis og møterom, litt i kjellar	2,5 mill.	2,3 mill.
4	Nytt garderobebygg, alt. 2: berre nytt tak, dør	3,2 mill.	0,4 mill.
5	Generell oppussing, nokre nye grupperom	4,2 mill.	4,2 mill.
6	Oppgradering av elektro, lys	3,6 mill.	3,6 mill.
7	Utvendig, rampar, skoleplass, asfaltering	1,7 mill.	1,7 mill.
8	Prosjektering, planlegging, prosjektleiing, byggeleiing	2,0 mill.	1,5 mill.
9	Forv. tillegg, usikkerheit, 15 %	3,2 mill.	2,5 mill.
10	Sum	24,7 mill.	19,4 mill.
11	Kostnad for kommunen med kompensert mva.	19,8 mill.	15,5 mill.