Sluttrapportering Sør-AurdalshallenLEIAREN 

Torsdag 20. mai skal kommunestyret behandle saka Sluttrapportering byggeprosjekt Sør-Aurdalshallen.

Kommunedirektøren har tidlegare sagt til Hedalen.no at kommunestyret skulle få ein revidert rekneskap for prosjektet. Saka vert likevel lagt fram for kommunestyret utan dette, og inneheld berre nokre enkle hovudtal presentert av saksbehandlar. Trass dette tilrår kommunedirektøren at «Prosjektrekneskapen, som er ein del av rapporten, vert teken til etterretning.»

Sør-Aurdalshallen er det største investeringsprosjektet kommunen nokon gong har gjennomført. Det endelege budsjettet var på 160 millionar kroner, etter å ha auka kraftig fleire gonger.

Når dei folkevalde vert bedne om å godkjenne rekneskapen for dette prosjektet, treng dei eit solid, uavhengig og fagleg grunnlag å støtte seg på. Det som no vert lagt fram i saka, er etter vår meining ikkje ein fullstendig prosjektrekneskap, og det ligg heller ikkje føre noko uttale frå revisor.

Vi meiner at dei folkevalde må avvise saka, og be om ein fullstendig prosjektrekneskap som er revidert og godkjend av revisor.