Ny bok løftar fram kulturhistoriske dammar i Drammensvassdraget

Torodd Lybeck er aktuell med boka Brøtningsdammane – kulturhistoriske monument i Drammensvassdraget, der han presenterer 150 dammar som framleis står att i elvar og sideelvar i Drammensvassdraget.

Boka inneheld både foto, kart og detaljert informasjon om dammane – frå Dokka, Etna og Begna i nord, til Sigdal og Skotselv i sør. Du kan mellom anna lese om damanlegg i både Hedalen og Vassfaret.

Gir nytt liv til gløymd teknologi

I boka greier Lybeck ut om kva rolle brøtningsdammane spelte i tømmerfløytinga frå 1700-talet og fram til 1900-talet. Han forklarar også skilnaden på brøtning og fløyting og gjev eit innblikk i den krevjande prosessen med å få tømmeret trygt nedover elvane.

Næring som bygde landet

Tømmerdrift og trelasthandel var sentrale næringar som la grunnlaget for Noregs økonomiske sjølvstende. Brøtningsdammane vert i boka løfta fram som fysiske minnesmerke over denne avgjerande delen av historia.

Ei praktbok med språk og bilete i særklasse

Torodd Lybeck har levert ei praktbok om brøtningsdammar i Drammensvassdraget. Den pensjonerte læraren skriv særs godt på nynorsk og er også ein dyktig fotograf.

Boka gjev innsikt i vår nære historie om sider av skogsdrift frå tida før tømmerbilar overtok tømmertransporten.

Boka Brøtningsdammane – kulturhistoriske monument i Drammensvassdraget (Kvitvella forlag) kan du kjøpe på mellom anna Joker Hedalen.

.